ஹோமாகம பொலிஸ் நிலையத்தில் இடம்பெற்ற சம்பவம் தொடர்பாகக் கேள்வி எழுப்பிய ராஜபக்ஷ, குறித்த சம்பவம் தொடர்பில் அதிகாரிகள் வழங்கிய பதிலிலும் தனது அதிருப்தியை வெளிப்படுத்தினார்.
பொலிஸார் துரத்திச் சென்றபோது 16 வயது சிறுவன் ஒருவர் சுடப்பட்டதாகக் கூறப்படும் சம்பவம் குறித்தும் அவர் கவலை வெளியிட்டார். சிறுவன் மீது இவ்வாறான உயிருக்கு ஆபத்தான பலப்பிரயோகம் மேற்கொள்ளப்பட்டது நியாயமானதா என்றும் அவர் கேள்வி எழுப்பினார்.
அத்துடன், குருநாகல் பகுதியில் இடம்பெற்ற சில சம்பவங்களைச் சுட்டிக்காட்டிய அவர், பொலிஸார் முறையற்ற நடவடிக்கைகளில் ஈடுபட்டதாகக் குற்றம் சாட்டினார். குறிப்பாக, வீடொன்றைச் சோதனையிடும் நடவடிக்கையின்போது கொள்ளைச் சம்பவத்தில் பொலிஸார் ஈடுபட்டதாகவும் அவர் தெரிவித்தார்.
எம்பிலிப்பிட்டிய பகுதியில் அரசியல்வாதி ஒருவருடன் தொடர்புடையதாகக் கூறப்படும் கஞ்சா பயிர்ச்செய்கை இடமொன்றில் பொலிஸார் மேற்கொண்ட சோதனை நடவடிக்கை குறித்தும் அவர் பிரஸ்தாபித்தார்.
குறித்த நடவடிக்கையைத் தொடர்ந்து பொலிஸ் அதிகாரி ஒருவர் மீது ஒழுக்காற்று நடவடிக்கை எடுக்கப்பட்டதாகக் குறிப்பிட்ட அவர், மனித உரிமைகள் ஆணைக்குழு தலையிட்டிருந்த நிலையிலும் அந்த அதிகாரி ஏன் மீண்டும் பணியில் அமர்த்தப்படவில்லை எனக் கேள்வி எழுப்பினார்.
இதனிடையே, ‘கவந்திஸ்ஸ’ (Kavantissa) எனும் தந்தம் கொண்ட யானையின் மரணம் தொடர்பான விசாரணைகள் குறித்தும் ராஜபக்ஷ கேள்விகளை முன்வைத்தார். உண்மையான குற்றவாளிகளைக் கண்டறிவதற்குப் பதிலாக, ஒருவருக்கு எதிராகப் பொய்யான ஆதாரங்களை உருவாக்கும் முயற்சி இடம்பெறுவதாகவும் அவர் குற்றம் சாட்டினார்.
பொருளாதார நெருக்கடிக்குத் தீர்வு காண்பதில் அரசாங்கம் கவனம் செலுத்த வேண்டும்!
தனது உரையின் இறுதியில் அரசாங்கத்தின் பொருளாதாரக் கொள்கைகள் குறித்தும் கருத்து வெளியிட்ட ராஜபக்ஷ, அரசாங்கம் வெறுமனே அரசியல் அறிக்கைகளை வெளியிடுவதில் காலத்தைக் கழிக்காமல், நாட்டுக்கு முதலீடுகளை ஈர்த்தல், புதிய வேலைவாய்ப்புகளை உருவாக்குதல், பொதுச் சேவைகளை மேம்படுத்துதல் மற்றும் சாதாரண மக்கள் எதிர்கொள்ளும் பொருளாதார நெருக்கடிகளுக்குத் தீர்வு காணுதல் ஆகியவற்றில் கவனம் செலுத்த வேண்டும் என வலியுறுத்தினார்.
“நாடாளுமன்றத்திற்கு வந்து பிரம்மாண்டமான உரைகளை நிகழ்த்துவதாலோ அல்லது அப்பட்டமான பொய்களைக் கூறுவதாலோ பொருளாதாரத்தை நிர்வகிக்க முடியாது. அரசாங்கத்திடம் முறையான திட்டம் இருக்க வேண்டும். அந்தத் திட்டத்தின் ஊடாக மக்களுக்குப் பயனளிக்கும் உறுதியான பெறுபேறுகளை வழங்குவதற்கு உழைக்க வேண்டும்” என அவர் தெரிவித்தார்.
மேலும், ஜனாதிபதியின் மூன்றாவது வரவு-செலவுத் திட்டத்தை எதிர்க்கட்சி எதிர்பார்த்துக் காத்திருப்பதாகக் குறிப்பிட்ட அவர், அதில் மக்களின் பிரச்சினைகளுக்கான அர்த்தமுள்ள தீர்வுகள் முன்வைக்கப்படுமா அல்லது ஏற்கனவே வழங்கப்பட்டு நிறைவேற்றப்படாத வாக்குறுதிகளே மீண்டும் முன்வைக்கப்படுமா என்றும் கேள்வி எழுப்பினார்.