இங்கிலாந்துக்கு எதிராக இலங்கை அணி பெற்ற வரலாற்றுச் சிறப்புமிக்க வெற்றியைக் கொண்டாடுவதற்கு வீரர்கள் தகுதியானவர்கள் என இலங்கை அணியின் முன்னாள் தலைவரும் கிரிக்கெட் ஜாம்பவானுமான குமார் சங்கக்கார தெரிவித்துள்ளார்.
பவன், தசுன், ஜனித் மற்றும் அவிஷ்கா ஆகியோரின் அபாரமான திறமைகளே இந்த வெற்றிக்கு முக்கிய பங்களிப்பை வழங்கியதாக அவர் சுட்டிக்காட்டியுள்ளார்.
இந்த வெற்றியின் மகிழ்ச்சியை அனுபவிக்கும் அதேவேளை, எதிர்காலத்தில் எதிர்கொள்ள வேண்டிய சவால்கள் குறித்தும் அணி கவனம் செலுத்த வேண்டும் எனத் தனது ‘X’ சமூக வலைத்தளப் பதிவில் அவர் குறிப்பிட்டுள்ளார்.
மேலும், அடுத்த ஆண்டு ஒக்டோபர் மாதம் தென்னாப்பிரிக்காவில் நடைபெறவுள்ள உலகக் கிண்ணப் போட்டியை இலக்காகக் கொண்டு, அணியை வலுப்படுத்துவதற்கான நீண்டகாலத் திட்டங்களை இலங்கை கிரிக்கெட் நிர்வாகம் முன்னெடுக்க வேண்டுமெனவும் அவர் வலியுறுத்தியுள்ளார்.
இந்த வரலாற்று வெற்றியை அடிப்படையாகக் கொண்டு, இலங்கை அணியை உயர்ந்த நிலைக்குக் கொண்டுசெல்லத் திட்டமிட்ட அணுகுமுறையுடன் செயற்படுவது அவசியம் என்றும் குமார் சங்கக்கார தெரிவித்துள்ளார்.
பாகிஸ்தானில் நடைபெற்று வரும் முத்தரப்பு ஒருநாள் கிரிக்கெட் தொடரின் கீழ், இன்று (22) நடைபெற்ற போட்டியில் இங்கிலாந்து அணியை இலங்கை அணி 2 விக்கெட்டுகளால் வீழ்த்தி அபார வெற்றியைப் பதிவு செய்தது.
ராவல்பிண்டியில் நடைபெற்ற இப்போட்டியில், இங்கிலாந்து அணி நிர்ணயித்த 430 ஓட்டங்கள் என்ற பிரம்மாண்டமான இலக்கை இலங்கை அணி 49.5 ஓவர்களில், இன்னும் ஒரு பந்து மீதமிருக்கத் துரத்திப் பிடித்தது.
இந்த வெற்றியானது இலங்கை அணியின் துடுப்பாட்ட வலிமையையும், கடினமான சூழ்நிலைகளில் இலக்கை நோக்கிப் போராடும் திறனையும் வெளிப்படுத்தியுள்ளமை குறிப்பிடத்தக்கது.