இஸ்ரேல் சிறையில் இலங்கை ஆர்வலர் மனிதாபிமானமற்ற முறையில் அடைப்பு? வெளியுறவு அமைச்சகம் அவசர அறிக்கை

இலங்கை அரசாங்கம், இட்டாமர் பென்-க்விர் வெளியிட்டதாகக் கூறப்படும் காணொளிக் காட்சிகள் தொடர்பில் ஆழ்ந்த கவலையையும் கடும் வேதனையையும் வெளியிட்டுள்ளது.

“உலகளாவிய சுமுத் கப்பல் குழு” கைதிகள் மனிதாபிமானமற்ற முறையில் நடத்தப்படுவதாக அந்தக் காணொளிகளில் சித்தரிக்கப்படுவதாகத் தெரிகிறது என இலங்கை வெளியுறவு அமைச்சகம் தெரிவித்துள்ளது.

இதுகுறித்து வெளியிடப்பட்ட அறிக்கையில், பாதிக்கப்பட்டுள்ள இலங்கை நாட்டவருக்கு உடனடி தூதரக அணுகலை உறுதி செய்வதற்காக இஸ்ரேல் வெளியுறவு அமைச்சகத்துடன் இராஜதந்திர வழிகளில் தொடர்பு கொண்டு வருவதாக கூறப்பட்டுள்ளது.

மேலும், குறித்த இலங்கைப் பிரஜையின் பாதுகாப்பு, நல்வாழ்வு, கண்ணியம் மற்றும் விரைவான பாதுகாப்பான நாடு திரும்பலை உறுதி செய்ய தேவையான உத்தரவாதங்களைப் பெறுவதற்கும் நடவடிக்கைகள் மேற்கொள்ளப்பட்டுள்ளதாக தெரிவிக்கப்பட்டுள்ளது.

வெளிநாடுகளில் உள்ள இலங்கைப் பிரஜைகளின் பாதுகாப்பை உறுதி செய்வதில் அரசு முழுமையாக அர்ப்பணிப்புடன் செயல்படுவதாகவும் வெளியுறவு அமைச்சகம் வலியுறுத்தியுள்ளது.

சமீரா மெஹ்பூப்தீன், காசா மீதான முற்றுகையை உடைக்கும் நோக்கில் ஏற்பாடு செய்யப்பட்ட “உலகளாவிய சுமுத் கப்பல் குழு” என்ற சர்வதேச மனிதாபிமான பணியில் இணைவதற்காக ஏப்ரல் மாதம் இலங்கையிலிருந்து புறப்பட்டிருந்தார்.

கிட்டத்தட்ட 100 நாடுகளைச் சேர்ந்த ஆர்வலர்கள் பங்கேற்ற இந்த முயற்சியின் இறுதிக்கட்டமாக, 50-க்கும் மேற்பட்ட கப்பல்கள் சமீபத்தில் மர்மாரிஸ் நகரிலிருந்து காசாவை நோக்கி பயணித்தன.

இந்நிலையில், இஸ்ரேலிய கடற்படை அந்தக் கப்பல் அணிவகுப்பை இடைமறித்ததாக தெரிவிக்கப்படுகிறது. இதற்கு முன்னரும் இதேபோன்ற முயற்சி முறியடிக்கப்பட்டு, இரண்டு ஆர்வலர்கள் கைது செய்யப்பட்டிருந்தனர்.

இதற்கிடையில், தடுத்து வைக்கப்பட்டிருந்த காசா கப்பல் குழு ஆர்வலர்களை கேலி செய்யும் விதமாக வெளியிடப்பட்டதாகக் கூறப்படும் காணொளி, சர்வதேச அளவில் கடும் எதிர்ப்பை ஏற்படுத்தியுள்ளது.

பென்-க்விர் அலுவலகம் வெளியிட்டதாகக் கூறப்படும் காணொளிகளில், காசாவுக்கு உதவிப் பொருட்களை கொண்டு சென்ற ஆர்வலர்கள் கைது செய்யப்படுவதும், பின்னர் அஷ்டோட் துறைமுகம் பகுதியில் அமைக்கப்பட்ட தடுப்பு முகாமில் நெருக்கடியான சூழலில் வைக்கப்பட்டிருப்பதும் காணப்படுவதாக தகவல்கள் தெரிவிக்கின்றன.