பணக்காரர்களுக்கு செக் வைத்த ஆஸ்திரேலிய அரசு

உலக எரிபொருள் விநியோகத்தை பாதிக்கும் வகையில் அமெரிக்க முன்னாள் ஜனாதிபதி ட்ரம்ப் ஈரானுக்கு எதிராக எடுத்துள்ள நடவடிக்கைகள் மற்றும் கடுமையான பணவீக்க சூழ்நிலைகளுக்கு மத்தியில், அவுஸ்திரேலியா அரசு தனது 2026 கூட்டாட்சி வரவுசெலவுத் திட்டத்தை தாக்கல் செய்துள்ளது.

இந்த பட்ஜெட் சமூகத்தின் பல்வேறு தரப்பினரையும் வெவ்வேறு வகையில் பாதிக்கும் வகையில் அமைந்துள்ளதாக தெரிவிக்கப்படுகிறது. சில தரப்பினருக்கு வரிச் சலுகைகள் கிடைக்கும் நிலையில், மற்றவர்கள் புதிய சுமைகளை எதிர்கொள்ள வேண்டிய சூழலும் உருவாகியுள்ளது.

சாதாரண வரி செலுத்துவோருக்கு பல சலுகைகள் அறிவிக்கப்பட்டுள்ளன. 2027–28 வருமான ஆண்டிலிருந்து 1.25 கோடி ஆஸ்திரேலியர்களுக்கு 250 டாலர் வரிச்சலுகை வழங்கப்பட உள்ளது. மேலும், 18,201 முதல் 45,000 டாலர் வருமானம் பெறுவோருக்கான வரி விகிதம் 15% இலிருந்து 2027 ஜூலை முதல் 14% ஆக குறைக்கப்படும் என தெரிவிக்கப்பட்டுள்ளது. 2026–27 முதல் 1,000 டாலர் வரை ரசீதில்லா உடனடி வரிவிலக்கு வசதியும் அறிமுகப்படுத்தப்பட உள்ளது.

அதே நேரத்தில், பொதுத்துறை ஊழியர்களின் எண்ணிக்கை 217,256 ஆக உயர்த்தப்பட்டாலும், Australian Competition and Consumer Commission (ACCC) மற்றும் National Disability Insurance Agency (NDIA) போன்ற அமைப்புகளில் வேலைக் குறைப்புகளும் நடைபெறும் என கூறப்படுகிறது.

அறிவியல் மற்றும் தொழில்நுட்பத் துறைகளுக்கு குறிப்பிடத்தக்க நிதி ஒதுக்கீடுகள் வழங்கப்பட்டுள்ளன. அதன்படி, CSIRO நிறுவனத்திற்கு 387.4 மில்லியன் டாலரும், தேசிய அளவியல் நிறுவனத்திற்கு 273 மில்லியன் டாலரும், அவுஸ்திரேலிய ஸ்பேஸ் ஏஜென்சிக்கு க்கு 21.7 மில்லியன் டாலரும் ஒதுக்கப்பட்டுள்ளன.

மீடியா துறையில், Nine Network, Seven Network மற்றும் Network Ten ஆகிய வணிக ஒளிபரப்பு நிறுவனங்களுக்கு 2028 ஜூன் வரை வரிச்சலுகைகள் வழங்கப்பட உள்ளதாகவும், அதற்காக 111.3 மில்லியன் டாலர் ஒதுக்கப்பட்டுள்ளதாகவும் தெரிவிக்கப்படுகிறது.

வரி சீர்திருத்தங்கள் காரணமாக சுமார் 75,000 பேர் முதல் முறையாக வீடு வாங்கும் வாய்ப்பைப் பெறுவார்கள் என எதிர்பார்க்கப்படுகிறது. இருப்பினும், வாடகை வீடுகளில் வாழ்பவர்களுக்கு குறிப்பிடத்தக்க நிவாரணம் கிடைக்காது என்றும், வாராந்திர வாடகை சுமார் 2 டாலர் வரை அதிகரிக்கலாம் என்றும் கணிக்கப்பட்டுள்ளது.

அதேபோல், சட்டவிரோத புகையிலை வர்த்தகத்தை கட்டுப்படுத்த 20 மில்லியன் டாலர் ஒதுக்கப்பட்டுள்ள நிலையில், புகையிலை வரி வருவாய் 1.2 பில்லியன் டாலர் குறையக்கூடும் எனவும் அரசாங்கம் மதிப்பிட்டுள்ளது.

சொத்து முதலீட்டாளர்களுக்கு விதிக்கப்பட்ட மூலதன ஆதாய வரி உள்ளிட்ட சீர்திருத்தங்களால், உயர்ந்த வருமான குடும்பங்களுக்கு புதிய வரிக் கட்டுப்பாடுகள் அமலுக்கு வரும் நிலையில், 2028 முதல் டிரஸ்ட் வருமானங்களுக்கு 30% குறைந்தபட்ச வரி விதிக்கப்பட உள்ளது. இதன் மூலம் ஆண்டுக்கு சுமார் 4.5 பில்லியன் டாலர் கூடுதல் வருவாய் கிடைக்கும் என கணிக்கப்பட்டுள்ளது.

சுற்றுச்சூழல் பாதுகாப்புக்கு 99.6 மில்லியன் டாலர் ஒதுக்கப்பட்டிருந்தாலும், இது போதுமானதல்ல என நிபுணர்கள் கருத்து தெரிவிக்கின்றனர்.

குடியேற்ற சட்டங்கள் கடுமையாக்கப்பட்டுள்ளதால், வயதான மற்றும் குறைந்த திறன் கொண்ட குடியேற்றவாசிகளுக்கு நிரந்தர விசா பெறுவது கடினமாகும் எனவும் கூறப்படுகிறது.

இதேவேளை, வேலையின்மை விகிதம் 4.5% ஆக உயரக்கூடும் என்றும், சுமார் 50,000 பேர் வேலை இழக்க வாய்ப்பு உள்ளதாகவும் கணிப்புகள் தெரிவிக்கின்றன.