பிரிட்டன் பிரதமரும் தொழிலாளர் கட்சித் தலைவருமான கெய்ர் ஸ்டார்மர் இரு பதவிகளிலிருந்தும் விலகுவதாக அறிவித்துள்ளார். இதையடுத்து புதிய தலைமை யார் என்பதற்கான அரசியல் போட்டி தீவிரமடைந்துள்ளது.
இந்த நிலையில், தொழிலாளர் கட்சியின் முக்கிய தலைவர்களில் ஒருவராகக் கருதப்படும் ஆண்டி பர்ன்ஹாம் பிரதமர் வேட்பாளராக முன்னிறுத்தப்படுகிறார். “வடக்கு மன்னர்” என அழைக்கப்படும் அவர், கட்சிக்குள் வலுவான செல்வாக்கு கொண்டவராக அறியப்படுகிறார்.
1970ஆம் ஆண்டு மெர்சிசைடில் பிறந்த பர்ன்ஹாம், நீண்ட காலமாக தொழிலாளர் கட்சியில் செயல்பட்டு வருகிறார். 2001 முதல் 2017 வரை நாடாளுமன்ற உறுப்பினராக பணியாற்றிய அவர், முன்னாள் பிரதமர் கோர்டன் பிரவுன் அரசில் முக்கிய அமைச்சுப் பொறுப்புகளையும் வகித்துள்ளார்.
பின்னர் இருமுறை கட்சித் தலைமைப் போட்டியில் தோல்வியடைந்த அவர், 2017 முதல் 2026 வரை கிரேட்டர் மான்செஸ்டர் மேயராக செயல்பட்டு மக்களின் கவனத்தை ஈர்த்தார்.
கொரோனா காலத்தில் மத்திய அரசுடன் நேரடியாக மோதிய அவரது நிலைப்பாடு, வடக்கு இங்கிலாந்தின் உரிமைகளுக்காக அவர் எடுத்த முயற்சி ஆகியவற்றால் “வடக்கின் தலைவர்” எனப் பெயர் பெற்றார்.
சமீபத்தில் நடைபெற்ற மேக்கர்ஃபீல்ட் இடைத்தேர்தலில் வெற்றி பெற்று மீண்டும் நாடாளுமன்றம் சென்ற அவர், எதிர்காலத்தில் கட்சித் தலைமைப் போட்டியில் களமிறங்குவேன் என தெரிவித்துள்ளார்.
இதனால் தொழிலாளர் கட்சிக்குள் ஸ்டார்மர் மீது நிலவும் அதிருப்தியை பயன்படுத்தி, பர்ன்ஹாம் புதிய தலைவராக உருவெடுக்கலாம் என்ற எதிர்பார்ப்பு உருவாகியுள்ளது. எனினும் அவரது செல்வாக்கு தேசிய அளவில் விரிவடையுமா என்பது குறித்து கேள்விகள் நீடிக்கின்றன.