அமெரிக்காவில் நவம்பர் 3ஆம் திகதி நடைபெற்ற இடைக்காலத் தேர்தலில் ஜனாதிபதி டொனால்ட் ட்ரம்பின் குடியரசுக் கட்சி இரு அவைகளிலும் பெரும்பான்மையை இழந்துள்ளதாகத் தெரிவிக்கப்பட்டுள்ளது.
இந்நிலையில், ட்ரம்ப் நிர்வாகத்தில் குடிமை உரிமைகள் பிரிவின் தலைவராகவும் உதவி அட்டர்னி ஜெனரலாகவும் பணியாற்றிய இந்திய வம்சாவளியைச் சேர்ந்த ஹர்மீத் கவுர் தில்லன் தனது பதவியை ராஜினாமா செய்துள்ளார்.
ட்ரம்பின் தீவிர ஆதரவாளராக அறியப்படும் இவர், இடைத்தேர்தல் முடிவுகளுக்குப் பின்னர் ட்ரம்ப் நிர்வாகத்திலிருந்து விலகிய முதல் மூத்த அதிகாரியாகக் குறிப்பிடப்படுகிறார்.
அமெரிக்க அட்டர்னி ஜெனரல் டாட் பிளான்ச் தனது எக்ஸ் (X) சமூக வலைத்தளப் பக்கத்தில் ஹர்மீத் தில்லனின் ராஜினாமா தொடர்பான அறிவிப்பை வெளியிட்டுள்ளார்.
அதில், ஒவ்வொரு அமெரிக்கக் குடிமகனின் குடிமை உரிமைகளையும் அவர் பாதுகாத்ததாகவும், அச்சமின்றி எவ்விதப் பாரபட்சமுமின்றி சட்டத்தை அமுல்படுத்தியதாகவும் பாராட்டியுள்ளார்.
மேலும், நீதித்துறையின் சார்பில் அவரது சேவைக்கு நன்றி தெரிவித்ததுடன், எதிர்காலப் பணிகளில் அவர் மேலும் பல வெற்றிகளைப் பெற வாழ்த்துவதாகவும் குறிப்பிட்டுள்ளார்.
இதேவேளை, இடைத்தேர்தலுக்கு ஒரு மாதத்திற்கு முன்னரே தனது ராஜினாமா கடிதத்தை சமர்ப்பித்ததாக ஹர்மீத் தில்லன் தெரிவித்துள்ளார்.
எனினும், தேர்தல் நிறைவடையும் வரை பதவியில் தொடருமாறு ட்ரம்பின் தலைமைப் பணியாளர் சூசி வைல்ஸ் தன்னிடம் கேட்டுக்கொண்டதாக அவர் ஃபொக்ஸ் நியூஸ் (Fox News) ஊடகத்திற்குத் தெரிவித்துள்ளார்.
அமெரிக்காவில் இடைக்காலத் தேர்தல்களுக்குப் பின்னர், புதிய அரசியல் சூழலுக்கு ஏற்ப ஜனாதிபதி தனது நிர்வாகத்தை மறுசீரமைப்பதற்கு வழிவகுக்கும் வகையில் மூத்த அதிகாரிகள் பதவி விலகுவது வழக்கமான நடைமுறையாகும்.
சண்டிகரில் பிறந்த ஹர்மீத் தில்லன், சிறுவயதில் தனது குடும்பத்துடன் முதலில் பிரித்தானியாவுக்கும் பின்னர் அமெரிக்காவுக்கும் குடிபெயர்ந்தவர்.
ட்ரம்பின் தீவிர ஆதரவாளராக இருந்தபோதிலும், தனது 18 மாத பதவிக்காலத்தில் சில விடயங்களில் மாறுபட்ட நிலைப்பாடுகளையும் அவர் எடுத்திருந்தார்.
குறிப்பாக, குடியேற்றக் கொள்கைகள் தொடர்பில் சீக்கிய லொறி சாரதிகளை இலக்கு வைக்கும் நடவடிக்கைகளுக்கு அவர் கடுமையான எதிர்ப்பை வெளியிட்டிருந்தமை குறிப்பிடத்தக்கது.