குற்றப் புலனாய்வுத் திணைக்களத்தின் தடுப்புக் காவலில் இருந்து கொழும்பு தேசிய வைத்தியசாலையில் சிகிச்சை பெற்று வரும் அரச புலனாய்வுச் சேவையின் முன்னாள் பணிப்பாளர் ஓய்வுபெற்ற மேஜர் ஜெனரல் சுரேஷ் சலேயை தினமும் பார்வையிட அனுமதி வழங்குமாறு அவரது மனைவியும் சட்டத்தரணியும் கோரிக்கை விடுத்துள்ளனர்.
இதற்காக குற்றப் புலனாய்வுத் திணைக்களத்தின் பணிப்பாளர் ஷானி அபேசேகரவுக்கு தனித்தனியாக இரண்டு கடிதங்கள் அனுப்பப்பட்டுள்ளன.
உயிர்த்த ஞாயிறு தாக்குதல் தொடர்பான விசாரணைகளுக்காக தடுப்புக் காவலில் வைக்கப்பட்டுள்ள சுரேஷ் சலே, உடல்நலக்குறைவு காரணமாக தற்போது கொழும்பு தேசிய வைத்தியசாலையில் சிகிச்சை பெற்று வருகிறார்.
இந்த வழக்கு நேற்று (10) கோட்டை நீதவான் நீதிமன்றத்தில் விசாரணைக்கு எடுத்துக்கொள்ளப்பட்டபோது, நோயாளிகளைப் பார்வையிடும் நேரத்தில் அவரது மனைவிக்கும் மகனுக்கும் அவரை சந்திக்க அனுமதி வழங்குமாறு பாதுகாப்பு தரப்பு சட்டத்தரணிகள் கோரிக்கை விடுத்தனர்.
எனினும், பயங்கரவாதத் தடுப்புச் சட்டத்தின் கீழ் தடுப்புக் காவலில் உள்ள சந்தேகநபர் என்பதால் இவ்வாறான உத்தரவை வழங்க நீதிமன்றத்திற்கு அதிகாரம் இல்லை எனக் குறிப்பிட்டு, கோட்டை நீதவான் பசன் அமரசேன அந்தக் கோரிக்கையை நிராகரித்தார்.
இதனைத் தொடர்ந்து, தனது கணவரை தினமும் பார்வையிட அனுமதி வழங்குமாறு சுரேஷ் சலேயின் மனைவி கோரிக்கை விடுத்துள்ளதுடன், அவரது சட்டத்தரணியும் தொழில்முறை கடமைகளை முன்னிறுத்தி தினசரி சந்திப்பதற்கான அனுமதியை கோரியுள்ளார்.
இதற்கிடையில், உயிர்த்த ஞாயிறு தாக்குதல் தொடர்பான விசாரணைகளுக்கு இடையூறு ஏற்படக்கூடாது என்றும், நியாயமான விசாரணை முன்னெடுக்கப்பட வேண்டும் என்றும் வலியுறுத்தி, நீர்கொழும்பு – கொழும்பு பிரதான வீதியின் பால்திய சந்தி பகுதியில் இன்று (11) அமைதிப் போராட்டம் ஒன்று முன்னெடுக்கப்பட்டது.
கட்டுவாப்பிட்டி தேவாலயத் தாக்குதலில் பாதிக்கப்பட்டவர்களால் இந்தப் போராட்டம் ஏற்பாடு செய்யப்பட்டிருந்தது.