நேற்று (10) மாலை 5.30 மணி நிலவரப்படி, சீரற்ற காலநிலை காரணமாக குறைந்தது 25 பேர் இறந்துள்ளதோடு ஒருவர் காணாமல் போயுள்ளார். மேலும் ஏழு பேர் காயங்களுக்கு உள்ளாகியுள்ளனர் என்று அனர்த்த முகாமைத்துவ அமைச்சு அறிவித்துள்ளது.
புத்தளம், கேகாலை மற்றும் குருநாகல் மாவட்டங்களில் தலா 6 பேரும், பதுளை மாவட்டத்தில் 4 பேரும், மாத்தளை, காலி மற்றும் முல்லைத்தீவு மாவட்டங்களில் தலா ஒரு மரணமும் பதிவாகியுள்ளதாக அனர்த்த முகாமைத்துவ அமைச்சு தெரிவித்துள்ளது. காயமடைந்தவர்கள் காலி, கேகாலை, புத்தளம் மற்றும் குருநாகல் மாவட்டங்களைச் சேர்ந்தவர்கள் என அடையாளம் காணப்பட்டுள்ளனர்.
மேலும், மாலை 5.30 மணி நிலவரப்படி. நேற்று, சீரற்ற காலநிலை காரணமாக 17 மாவட்டங்களில் உள்ள 145 பிரதேச செயலகப் பிரிவுகளில் 60,264 குடும்பங்களைச் சேர்ந்த 212,060 பேர் பாதிக்கப்பட்டுள்ளனர். அவர்களில் 3,648 குடும்பங்களைச் சேர்ந்த 12,476 பேர் 76 பாதுகாப்பான மையங்களிலும், 10,023 குடும்பங்களைச் சேர்ந்த 37,690 பேர் உறவினர் வீடுகளிலும் தங்கியுள்ளனர்.
23 முழுமையான சேதங்கள் மற்றும் 1,229 பகுதி சேதங்கள் உட்பட பல சொத்து சேதங்களும் பதிவாகியுள்ளன.
இதற்கிடையில் தேசிய கட்டிட ஆராய்ச்சி நிறுவனம் மொத்தம் 11 மாவட்டங்களுக்கு நிலச்சரிவு எச்சரிக்கையை விடுத்துள்ளது, பல பகுதிகளில் 75 மில்லிமீட்டருக்கு மேல் மழை பெய்துள்ளது.
