செப்டெம்பர் மாதம் தமிழ்நாட்டு அகதி முகாம்களில் இருந்தும் ஏனைய தனியார் குடியிருப்புகளிலிருந்தும் காணாமல் போன 65 இலங்கை அகதிகளின் நிலை குறித்து தமிழக பொலிஸார் இன்னும் இருட்டில் தவிப்பதாக இந்திய ஊடகங்கள் செய்தி வெளியிட்டுள்ளன.
மாலைதீவுக்கு அருகிலுள்ள டியாகோ கார்சியா என்ற தீவில் சிக்கித் தவிக்கும் அகதிகள் குறித்து இரண்டு வாரங்களுக்கு முன்பு செய்திகள் வெளியான போதிலும் அவர்களின் அடையாளங்கள் குறித்து இதுவரை உறுதி செய்யப்படவில்லை என்று தமிழக பொலிஸ் வட்டாரங்கள் தெரிவித்தன.
இலங்கை அகதிகள் இந்த ஆண்டு ஒக்டோபர் முதல் வாரத்தில் கேரளா கடற்கரையிலிருந்து சட்டவிரோத படகு மூலம் கனடாவுக்குச் சென்றதாக நம்பப்படுகிறது. அவர்கள் தங்கள் முதல் கடல் பயணத்தில் தென்னாப்பிரிக்காவை அடைவதற்காக இந்தியப் பெருங்கடலைக் கடந்ததாகக் கூறப்படுகிறது. அறிவிக்கப்பட்ட பயணத் திட்டத்தின்படி, தென்னாப்பிரிக்காவில் இருந்து, அவர்கள் மேலும் சட்டவிரோத படகு மூலம் கடல் வழியாக கனடாவுக்குச் செல்வார்கள்.
‘இதுவரை அவர்களின் நிலை குறித்து எந்த தகவலும் இல்லை. அவர்கள் டியாகோ கார்சியாவில் காணப்பட்டதாக உறுதி செய்யப்படாத செய்திகளைத் தொடர்ந்து தமிழ்நாடு காவல்துறை இன்டர்போலுக்கு எச்சரிக்கை விடுத்துள்ளது. ஆனால் அதிகாரப்பூர்வமாக எந்த தகவலும் இல்லை, ‘என்று வட்டாரங்கள் குறிப்பிட்டன.
தமிழகத்தில் உள்ள 108 அகதிகள் முகாம்களில் சுமார் 65,000 இலங்கை அகதிகள் தங்கியிருப்பதாக அரசு வட்டாரங்கள் தெரிவிக்கின்றன.
