இலங்கை கிரிக்கெட் தனது ஐந்து சத பணத்தை வெளியில் யாருடைய பாவனைக்காகவும் செலவிடவில்லை என்பது இன்று நிரூபணமானால் நாளை தனது பதவியை இராஜினாமா செய்வதாக இலங்கை கிரிக்கெட் தலைவர் ஷம்மி சில்வா நேற்று (25) தெரிவித்துள்ளார்.
கொழும்பு எஸ். எஸ். சி. மைதான வளாகத்தில் நேற்று இடம்பெற்ற ஊடகவியலாளர் சந்திப்பில் இதனைக் குறிப்பிட்ட அவர், இலங்கை கிரிக்கெட் நிறுவனம் தொடர்பான கணக்காய்வு அறிக்கைக்கு எதிர்வரும் 16ஆம் திகதிக்கு முன்னர் பதில்களை வழங்கவுள்ளதாக மேலும் தெரிவித்தார்.
தணிக்கை அறிக்கையின் வரைவு ஜூன் 18ஆம் திகதி தமக்குக் கிடைத்ததாகவும், அதற்குப் பதிலளிப்பதற்கு ஆகஸ்ட் 22ஆம் திகதி வரை கால அவகாசம் கேட்டதாகவும், பின்னர் ஆகஸ்ட் 16ஆம் திகதி வரைக்கும் காலம் குறைக்கப்பட்டதாகவும் இலங்கை கிரிக்கெட் தலைவர் தெரிவித்தார்.
எவ்வாறாயினும், கணக்காய்வாளர் திணைக்களத்தினால் விளையாட்டுத்துறை அமைச்சுக்கு அனுப்பப்பட்ட கணக்காய்வு அறிக்கையின் வரைவு வெளி தரப்பினரால் பெற்றுக்கொள்ளப்பட்டமையும், அசல் அட்டையின்றி வரைபை பெற்றுக்கொண்ட அதேவேளை, மேற்கூறிய வெளி தரப்பினரும் அதனை அசல் அட்டையுடன் பெற்றுக்கொண்டமை சிக்கல் எனவும் கிரிக்கட் தலைவர் தெரிவித்துள்ளார்.
இலங்கை கிரிக்கெட் நிறுவனத்தின் உப தலைவர் ஜெயந்த தர்மதாச இலங்கை திரைப்படக் கூட்டுத்தாபனத்தின் தலைவராக இரண்டு தடவைகள் பதவி வகித்தவர், அப்படிப்பட்டவரை கலைஞர்களுடன் பழகாமல் கைதிகளுடன் பழகச் சொல்வீர்களா என ஊடகவியலாளர் ஒருவர் எழுப்பிய கேள்விக்கு கிரிக்கெட் தலைவர் பதிலளித்தார்.
இந்தியாவில் கிரிக்கெட்டை ஊக்குவிக்க பாலிவுட் நட்சத்திரங்கள் பல பயணங்களில் அணியில் இணைகிறார்கள் என்றும், நடிகர்கள், நடிகைகள் மற்றும் பாடகர்கள் தங்கள் அணியை ஊக்குவிக்க பங்கேற்பது இந்தியாவில் மட்டுமல்ல, உலகிலேயே புதிய விஷயம் அல்ல என்றும் கிரிக்கெட் தலைவர் குறிப்பிட்டார்.
ஆனால் இலங்கை அணியின் உலகக் கிண்ண போட்டிகளை பார்க்க நடிகர் நடிகைகள் பங்கேற்பது சிலருக்கு பொறுக்க முடியாத பொறாமையை ஏற்படுத்தியுள்ளது அதனால் தான் பல அவதூறுகளை பரப்புகிறார்கள் என கிரிக்கெட் தலைவர் தெரிவித்துள்ளார்.
ஸ்ரீலங்கா கிரிக்கட் தொடர்பான கணக்காய்வு அறிக்கையின் வரைவை ஊடகங்களுக்குக் காட்டி குற்றச்சாட்டை முன்வைத்த ஹேஷா விதானகே, கணக்காய்வாளர் நாயகத்தின் அறிக்கைக்கும் வரைவுக்கும் உள்ள வித்தியாசத்தை புரிந்து கொள்ள முடியாமல் போனதற்கு வருந்துவதாகவும் கிரிக்கெட் தலைவர் குறிப்பிட்டார்.
2022 ஆம் ஆண்டு அவுஸ்திரேலியாவில் நடைபெறவுள்ள உலகக் கிண்ண கிரிக்கெட் போட்டியை காண விசா கோரி கடிதம் வழங்கிய வெளிநாட்டினர் 23 பேரில் 12 பேர் அவுஸ்திரேலியா செல்லவில்லை எனவும் அவர்கள் விசா கிடைத்தவுடன் எமது போட்டிகள் முடிந்துவிட்டதே எனவும் கிரிக்கெட் தலைவர் குறிப்பிட்டுள்ளார்.
அவுஸ்திரேலியா சென்ற 11 பேரும் தனிப்பட்ட பணத்தில் சென்றதாக கிரிக்கெட் தலைவர் தெரிவித்துள்ளார்.
இந்த கிரிக்கட் நிறுவனத்தை தாம் பொறுப்பேற்ற போது முன்னாள் அதிகாரிகளால் சுரண்டப்பட்டு 4 பில்லியன் ரூபா நஷ்டம் ஏற்பட்டுள்ளதாகவும், இருந்த நிறுவனத்தை 35 மில்லியன் டொலர் கையிருப்பு உள்ள நிறுவனமாக மாற்றிய போதும் அதனை சந்தைப்படுத்த ஆரம்பிக்கவில்லை எனவும் கிரிக்கட் தலைவர் தெரிவித்தார்.
இந்த ஊடகவியலாளர் சந்திப்பில் இலங்கை கிரிக்கட் செயலாளர் மொஹான் டி சில்வா, உப தலைவர் ஜயந்த தர்மதாச, பொருளாளர் சுஜீவ கொடலியத்த மற்றும் பிரதம நிறைவேற்று அதிகாரி அஷ்லி டி சில்வா ஆகியோர் கலந்துகொண்டனர்.
