சர்வதேச நாணய நிதியத்திற்கான இலங்கையின் கடன் கோரிக்கை விண்ணப்பத்திற்கு ஆதரவு வழங்குவதற்கு சீனாவின் இறக்குமதி மற்றும் ஏற்றுமதி வங்கி உறுதியளித்துள்ளதாக சீனா தெரிவித்துள்ளது.
இதற்கான ஆவணங்களை சீனா இறக்குமதி மற்றும் ஏற்றுமதி வங்கி, நிதி அமைச்சுக்கு கையளித்துள்ளதாக சீன வெளிவிவகார அமைச்சின் பேச்சாளர் மாஓ நின்க், நாளாந்த ஊடகவியலாளர் சந்திப்பில் குறிப்பிட்டுள்ளார்.
இலங்கைக்கான குறுகிய கால கடனை செலுத்துவதற்கு இரண்டு வருடங்கள் வழங்கவும் இணக்கம் தெரிவிக்கப்பட்டுள்ளதாக அவர் சுட்டிக்காட்டியுள்ளார்
சர்வதேச இறையாண்மை பத்திரம் வைத்திருப்பவர்கள் மற்றும் பலதரப்பு கடனளிப்பவர்கள் உட்பட வர்த்தக கடன் வழங்குநர்கள் இலங்கை தொடர்பாக அதிகபட்ச பங்களிப்பை வழங்குமாறு தொடர்ச்சியாக கோரப்படுகின்றனர் எனவும் அவர் தெரிவித்துள்ளார்.
இலங்கையின் கடன் மறுசீரமைப்பு செயல்முறைக்கு சீனா தொடர்ந்து ஆதரவளிக்கும் என்றும், இலங்கையின் கடன் சுமையை குறைப்பதற்கும் நிலையான அபிவிருத்தியை அடைவதற்கும் சாதகமான பங்கை வகிக்க சர்வதேச நிதி நிறுவனங்களுடன் இணைந்து பணியாற்றும் என்றும் அவர் மேலும் கூறியுள்ளார்.
