இராஜாங்க அமைச்சர் டயானா கமகேவுக்கு குடிவரவு மற்றும் குடியகல்வு திணைக்களத்தினால் இராஜாங்க கடவுச்சீட்டு வழங்கியமை தொடர்பில் விசாரணை நடத்துமாறு இலஞ்ச ஊழல் விசாரணை ஆணைக்குழுவிடம் முறைப்பாடு செய்யப்பட்டுள்ளது.
இது தொடர்பில் டெய்லி சிலோன் செய்தி பிரிவு தொடர்பு கொண்டு கேட்ட போது, சமூக ஆர்வலரான ஓஷல ஹேரத்தால் இன்று (20) இது தொடர்பான முறைப்பாடு செய்யப்பட்டுள்ளதாக ஆணைக்குழுவின் செயலாளர் அப்சரா கல்தேரா தெரிவித்தார்.
இராஜாங்க அமைச்சர் டயானா கமகே பிரித்தானிய குடியுரிமை பெற்றவர் எனவும், எனவே அவருக்கு இராஜதந்திர கடவுச்சீட்டு வழங்குவது குடிவரவு மற்றும் குடியகல்வு சட்டத்திற்கு எதிரானது எனவும் ஓஷல ஹேரத் சுட்டிக்காட்டியுள்ளார்.
எனினும் தாம் நம்பிக்கையுடன் இருப்பதாகவும் தன்னை யாராலும் அசைக்க முடியாது என்றும் தான் சட்டவிரோதமான செயல்களில் ஈடுபடவில்லை என்றும், நீதியினை நீதிமன்றம் வழங்கும் என்றும் அண்மைக்காலமாக டயனா கமகே பாராளுமன்ற அமர்வுகளில் தொடர்ந்தும் தெரிவித்து வந்திருந்தமையும் குறிப்பிடத்தக்கது.
