இந்த ஆண்டு ஜனவரி முதலாம் திகதியில் இருந்து தற்போது வரை நாடு முழுவதும் 10,886 டெங்கு நோயாளிகள் பதிவாகியுள்ளனர். இது 2024 ஆம் ஆண்டின் இதே காலகட்டத்துடன் ஒப்பிடும்போது 43.4% குறைவு.
இருப்பினும், இந்த நாட்களில் அவ்வப்போது பெய்யும் மழை காரணமாக வரும் நாட்களில் டெங்கு நோயாளிகள் அதிகரிக்கும் அபாயம் இருப்பதாக சுகாதார அதிகாரிகள் தெரிவித்து உள்ளனர்.
இதனால் இந்த சூழ்நிலையில் டெங்கு பரவலைக் கட்டுப்படுத்த தேசிய டெங்கு கட்டுப்பாட்டுப் பிரிவு, கொழும்பு நகரப் பிரிவு, கம்பஹா, களுத்துறை, மாத்தறை, மாத்தளை, மட்டக்களப்பு, இரத்தினபுரி மற்றும் திருகோணமலை மாவட்டங்களில் உள்ள 37 அதிகமாக டெங்கு பரவக்கூடிய இடங்களா அடையாளம் காணப்பட்ட சுகாதார மருத்துவ அதிகாரி பிரிவுகளை மையமாகக் கொண்டு, தற்போதுள்ள தரவுகளின் அடிப்படையில் ஒரு சிறப்பு டெங்கு கட்டுப்பாட்டு களத் திட்டத்தை நடத்த திட்டமிட்டுள்ளது.
இந்த நிகழ்ச்சி மார்ச் 27, 28 மற்றும் 29 ஆகிய திகதிகளில் நடைபெறும். இதன் போது, வீடுகள், பள்ளிகள், பணியிடங்கள், நிறுவனங்கள், தொழிற்சாலைகள், வழிபாட்டுத் தலங்கள், பொது இடங்கள் மற்றும் ஆபத்தான பகுதிகளில் உள்ள பிற வளாகங்கள் கள ஆய்வுக் குழுக்களின் பங்கேற்புடன் கண்காணிக்கப்படும்.
இந்த கள ஆய்வுக் குழுக்களில் சுகாதாரப் பணியாளர்கள், முப்படை அதிகாரிகள், காவல்துறை அதிகாரிகள் மற்றும் தன்னார்வலர்கள் உள்ளனர். இந்த குழுக்கள் சம்பந்தப்பட்ட பகுதிகளில் உள்ள வீடுகள் மற்றும் சுற்றுப்புறங்களில் கொசுக்கள் பெருகுவதைத் தடுக்க விழிப்புணர்வு பிரச்சாரங்களை நடத்தவும் திட்டமிடப்பட்டுள்ளன.
எந்தவொரு சூழலிலும் டெங்கு கொசு இனப்பெருக்கம் செய்யும் அபாயம் இருப்பதால், இது குறித்து ஆராய்ந்து கொசுக்கள் இனப்பெருக்கம் செய்யக்கூடிய இடங்களை அழிக்க வாரத்திற்கு குறைந்தது 30 நிமிடங்களாவது செலவிடுமாறு தேசிய டெங்கு கட்டுப்பாட்டு பிரிவு பொதுமக்களை கேட்டுக்கொள்கிறது.
மேலும், அதிக காய்ச்சல், தலைவலி, தசை மற்றும் மூட்டு வலி, குமட்டல் மற்றும் வாந்தி, தோலில் சிவப்பு புள்ளிகள் மற்றும் இரத்தப்போக்கு ஏற்பட்டால் உடனடியாக மருத்துவமனை அல்லது தகுதிவாய்ந்த மருத்துவரை அணுகி முறையான சிகிச்சை பெறுமாறு தேசிய டெங்கு கட்டுப்பாட்டு பிரிவு கேட்டுக் கொண்டுள்ளது.
மேலும், காய்ச்சலைக் கட்டுப்படுத்த பாராசிட்டமால் மட்டுமே எடுத்துக்கொள்ளவும், NSAID மருந்துகள் (ஆஸ்பிரின், மெஃபெனாமிக் அமிலம், இப்யூபுரூஃபன், டைக்ளோஃபெனாக்) மற்றும் ஸ்டீராய்டுகள் (ப்ரெட்னிசோலோன், டெக்ஸாமெதாசோன்) ஆகியவற்றைப் பயன்படுத்துவதைத் தவிர்க்கும் படி தேசிய டெங்கு கட்டுப்பாட்டுப் பிரிவு பொதுமக்களை மேலும் கேட்டுக் கொண்டுள்ளது.
