சட்டவிரோத கருத்தடை சத்திரசிகிச்சைகளை மேற்கொண்டதாக குற்றம் சுமத்தப்பட்ட குருநாகல் போதனா வைத்தியசாலையின் வைத்தியர் ஷாஃபி ஷிஹாப்தீனை மீள பணிக்கு அழைப்பதற்கு இதுவரை தீர்மானிக்கவில்லையென அரச சேவை ஆணைக்குழுவின் சுகாதார சேவைகள் குழு தெரிவித்துள்ளது.
சுகாதார செயலாளரின் பணிப்புரையின் பேரில், தாபனங்கள் சட்டத்தின் 12ஆவது அத்தியாயத்தின் 22 சரத்துக்கமைய, 2019 மே 11 ஆம் திகதி முதல் வைத்தியர் ஷாஃபி ஷிஹாப்தீன் கட்டாய விடுமுறையில் அனுப்பப்பட்டுள்ளார்.
எவ்வாறாயினும், கூடிய விரைவில் அறிக்கையை அனுப்ப பூர்வாங்க விசாரணைக் குழுவொன்று நியமிக்கப்பட்டுள்ள போதிலும், அதற்கான அறிக்கை இதுவரை தமக்கு கிடைக்கவில்லை என அரச சேவை ஆணைக்குழுவின் சுகாதார சேவைகள் குழுவின் செயலாளர் மேலும் குறிப்பிட்டுள்ளார்.
